Søskenbarnsida - Sætre
Med utgangspunkt i
Søskenbarntreff i Stryn 2.-4. sept. 2005
* * * * * * * * * * * * * * * * * * * * * * * * * * * * * *
Takk for ei strålande helg!
Bergen, den
5. sept. 2005: Vidare oppdateringar, og utlegging av noko av biletmaterialet, vil
følgje om nokre dagar. De som har teke digitalbilete: Ver vennlege, send meg
det de har på ein CD. De som har teke vanlege fotos: Ver vennlege, få dei
omgjorde til digital versjon i fotobutikken (be om det når de leverer inn til
framkalling), eller lån meg filmane, og send meg det de har og som de meiner
kan brukast. Tanken er nå at eg samlar saman alt biletmaterialet frå alle som
sender inn, så får eg laga ein samle-CD til alle, og sender den i posten til
den einskilde. Denne CDen vil då kunne brukast anten direkte på eiga datamaskin
(som de så sjølve kan skrive ut dei bileta de vil ha frå), eller ved at de går
til fotobutikken og ber om utskrift i fotopapirversjon dér av det de vil ha frå
samle-CDen.
Eg skal om litt
også byggje om nettsidene våre noko, slik at vi tek vare på det vi vil ha
vidare nytte av i framtida -- og slik at vi har eit samlande treffpunkt! Dersom
nokon har lagt igjen festsongheftet sitt; vend dykk til meg og eg ettersender
det. Ver gilde og oversend opplysningar om eventuelle endringar i
epostadresser, telefonnummer og adresser, slik at vi lett kan nå einannan også
vidare framover. Har de stoff de meiner er av felles interesse (soger frå
turane vi gjorde laurdagen t.d., eller eldre bilete (som eg kan scanne og
leggje ut), eller andre ting), så send det til meg, og eg skal gjere det felles
tilgjengeleg. Utviklingar i det einskilde søskenbarnets familie av typen barn
eller barnebarn til dømes, osv. osv., vil vere av interesse her, eller kva som
helst anna.
Hjarteleg
takk til dykk alle saman for den storveges responsen, frammøtet, det gode
humøret og alle arbeidsinnsatsane de einskildvis gjorde med kaker, musikk,
talar, songar, mattingingar, avtalar, rigging, dekking, vasking, rydding,
køyring osv., osv. -- og for det storveges samværet vi hadde over tre fagre
Stryne-dagar. Og med eit ver og ein Nordfjord-natur som synte seg frå sine
aller beste sider just då vi hadde bruk for det! -- Ei heilt spesiell takk går
framleis og heile tida til Margrete og Jan Inge. De er heilt eineståande!
- Lars
* * * * * * * * * * * * * * * * * * * * * * * * * * * * *
*
Nye sidetilvisingar og utlegging av nytt stoff finn de ved å klikke på linjene ovanfor til høgre.
Nedanfor står det første kontakt- og initiativbrevet, som gjekk ut i mai like før pinse.
* * * * * * * * * * * * * * * * * * * * * * * * * * * * *
Bergen/Oslo, i mai 2005
Hei
alle søskenbarn og makar!
Då vi skildest
etter gravferda til Anne Grete i fjor, var det mange av oss som hadde snakka
saman om snart å freiste å få til ei samling med makar. Det siste eg gjorde før
vi for til Bergen att, var å love Olaug at eg skulle ta eit initiativ ut på
nyåret.
Olaug og eg har
korrespondert om dette i vår, og vi har rådført oss med Ola-Jørgen, min Ola
bror, og med Jan Inge og Margrete. Olaug og eg står gjerne for organiseringa,
og med litt hjelp lokalt, ser det ut til at vi skal få dette til.
Lokalt - det ser
ut til å vere stor semje om at staden vi aller helst kunne tenkje oss å
treffast, er Stryn - alle sætrars fødeland. Ønske om tidspunkt vil sikkert
variere, men her har vi måtta leggje mange omsyn oppå kvarandre og ta ei
avgjerd. Samlinga blir frå fredag ettermiddag/kveld den 2. sept. og varer
til utpå sundagen den 4. sept.
Litt program skal
vi få på plass etter kvart, men det treng vel ikkje vere så overvettes - å vere
saman, prate, hygge oss og minnast er sikkert det aller viktigaste. Og vi kunne
gjerne, alle saman eller i grupper, eine dagen ta ein tur på setra, eller få
til den klassiske fisketuren på Loenvatnet, eller køyre ein tur til Hornindal
(med Aasebøstøl og Brændefur), til Kirkeeide og gravene, eller vidare oppover i
bygda, eller nedover til Eid, nedom Faleide, eller...eller.
Dette
har vi gjort så langt:
* Eg har laga til eit
oppsett over namn, adresser, telefonnummer og epostadresser så langt eg har
klart. Det følgjer vedlagt, og eg ber alle returnere opplysningar om det som
ennå er uutfylt, om rettingar osv. Hugs å angi fødseldato og -år. Skriv gjerne
til epostadressa mi: lars.saetre@lili.uib.no
Denne sida, saman
med ei internettside med plass til program, bilete, opplysningar, soger og alt
anna vi måtte komme på, hadde eg så tenkt å leggje på nettet til bruk for oss
alle. Ver gilde, hjelp til med å gjere søskenbarn-oppsettet så fullstendig som
mogleg!
* Vi har avtalt med Jan
Inge, som tingar rjomegrautmat og desslike i Kulturhuset fredagskvelden, og som
tingar festmiddag for oss på Hotell Stryn laurdagskvelden.
* Eg har vore i kontakt med
Vesla Bergem, som frå sitt vakre Vesla Pensjonat på Myrane melder at ho er glad
for å kunne huse kring 25 av dei tilreisande blant oss. Ho vil melde om
overnattingsprisar etter kvart, og når vi ser påmeldingane, skal vi etter trong
kople til fleire rom, t.d. ved Oscarshall eller ved Hotell Stryn. Eg har frist
hos Vesla til dei første dagane av juni.
Som sagt, vidare
planar og program fyller vi inn etter kvart, og her er vi opne for alle slags
og alle sine framlegg og gode idéar. Éin ting er vi likevel fast bestemte på:
at vi inviterer våre trauste og sterke kvinnelege seniorar til å vere saman med
oss - tante Kåra, tante Oddbjørg, tante Oddlaug og tante Ruth, alt etter kva
dei ønskjer og har tæl til å vere med på. Kanskje vil dei også ha stunder for
seg sjølve i løpet av helga.
Vi vonar de alle
tykkjer det er eit greit initiativ, dette, og ver gilde, merk dykk datoane - og
meld snarast råd, og seinast innan onsdag 1. juni frå til fetter Lars,
Birkebeinergaten 1, 5003 Bergen, mob. 95823232 - og aller helst til epost lars.saetre@lili.uib.no - om de kjem éin eller to
personar, kva overnattingsbehov de har, når de reknar med å komme og når de må
reise att - og om alle tankar og idéar de har som kan bidra til å gjere dette
til eit uforgløymeleg gjensyn, der vi kan ha all verdas moro og gaman, og
samstundes kan minnast Anne Grete som gjekk så altfor tidleg bort frå oss.
Hugs
opplysningane til søskenbarn-oppsettet, og gi respons så snart de kan!
Beste helsingar og klem frå
Larsemann
(- og med påhalden penn: Olaug, og alle dei andre nemnde)
